Kasaysayan sa Kinabuhi: Nangbisekleta Adto og Parola

Circa June 2012. Sa too mao si Totong ug sa wala morag si Jr ug sa tunga si Tonirit o si Fritz. 

 Niining pagkuha sa hulagway sa Parola sa Liloan diin nag-atubang mi sa kasadpan, among gihulat nga mosawop ang adlaw. Gikuhaan nakog hulagway, kay sa akong hunahuna nindot nga litratohan samtang nagpadulong sa pagtidlom ang adlaw. Piling nako nianang mga gutloa, usa ko ka photographer nga nikuha og momento - feelingero.

Kung wa ko masayop, mga alas singko kapin kana siya sa kahapunon ug sabot namo nga kung makompleto ang pagsawop sa adlaw mamauli nami. 

Dili na nako mahinumdoman kung unsang selpona ang gigamit nako niini pagpiktyur. Basta ang mosantop lang sa akong hunahuna ang selpon ni papa nga Nokia nga morag Nokia E61.o kadto ba kahang selpon niya nga Huawei nga Ascend Y nga nadaog niya sa Globe.

Dugay na nakong gipangita ning maong litratoha. Giutingkay na nako ang mga karaang photos nako sa Blogger,  nigamit pa og Way Back Machine pero naa ra diay sa Facebook ni Frits sa una niyang account nga wa na gamita.