Ang Paglitrato Sa Mga Gutlo Mahimong Kasaysayan Sa Kinabuhi

Karon nga naa na kita sa panahon diin sayon nalang kaayo maglitrato tungod sa teknolohiya. Dili parehas sa una nga kinahanglan pa nimo mangita og kodaker sa Fuente o sa Plaza Independencia. Karon sayon nalang kaayo tungod kay nagbaha ang mga selpon nga naay kamera. Maka-afford na ang tanan.

Busa dili pasagdaan ang mga importanteng gutlo sa kinabuhi nga dili madokyumento pinaagi sa paglitrato. Kung naa kay giadtoan nga lugar kinanglan dili gyud kalimtan ang kamera para imong malitratohan ang imong kaugalingon nga nianha ka nianang lugara ug kuhaan sad nimo'g larawan ang mga nindot nga dapit sa imong naadtoan.

Nindot man gud kung naa tay handumanan pinaagi sa larawan. Mahimo ning walay katapusan nga bahandi sa atong kasingkasing. Dili lang sa siguro nato matagaan og bili ang pagkakaron, pero kung molabay na ang panahon mahimo na ning handumanan. Diha na nato mahibal-an nga nindot diay ang kagahapon.

Daghan man kitag bati nga mga nangagi sa atong kinabuhi, pero pinaagi sa paglitrato sa mga malipayon nga mga higayon mao ni motambal ug makapahiyom kanato.

Busa kung asa man kita moadto dili nato sayangon ang mga malipayong panghitabo sa atong kinabuhi. Kuhaan dayon nato og litrato kay puhon inig labay sa taas nga katuigan mahimo na ning kasaysayan sa atong kinabuhi.

Para mas detalyado ang litrato, mas nindot nga isuwat nimo ang mga panghitabo. Pwede pinaagi sa talaadlawan o sa ingles pa diary. Samtang presko pa sa panumduman dapat isulat gyud dayon ang mga detalye.

Tan-awa kining akong picture nga gi-backup sa google photos gisuwat nako ang mga detalye para mas mahinumduman pa nako ang akong litrato. Murag nahog ra pod nga diary nako.

Makita nato sa picture nga sa toong bahin pwede nimo isulat ang mga detalye sa litrato.