Pagkinabuhi ubos sa imong kinitaan

Kita usahay makalimot kung unsay angay buhaton sa kwarta nga atong nagunitan. Wala nato hatagig bili nga kung dili nato palabihon ang pagtigom, mag-antos gyud ta sa umaabot.

Nagtrabaho ta walo ka oras sa usa ka adlaw, dayon inig sweldo ang atong hinagoan nakalimtan lang nato unsa ka bililhon. Gasto didto gasto ngari. Wala nato hunahunaa nga maanamanam ra'g kahilis ang atong hinagoan. Nagsalig man kay naay trabaho. Dili ra ba nato matag-an ang panahon nga bisag regular na kita sa trabaho pwede ning kuhaon nato puhon.

Kung mogasto man sa pagkaon morag wa nay ugma. Dili hunahunaon kung unsang sud-ana ang dili makaayo sa lawas, palit lang dayon bisag wala pa gi-budget ang kwarta. Dili kwentahon pilay makuhaan basta lang makasud-an og lami. Imbis planohon unsang sud-an ang maka-ayo sa lawas nga bisag dili mahal basta makaayo lang. Kay puhon mouli ra ba gyud sa lawas kung unsa ang atong gipasok sa atong baba.

Dili dautan nga mokaon og mga lamian nga mga pagkaon pero kung dili nato planohon ang atong pamaagi unsaon paggasto sa kwarta, nan mosangpot lang nga sa inig katiguwang walay makoot kay wala man gipalabi ang pagtigom sa kwarta.

Lipay-lipay dili usab dautan, pero kung pirmi kini buhaton ang atong kwarta kaonon niini. Ang paglipay-lipay makatabang sa lawas nga dili kita maghuna-huna sa problema pero kung pirmihon, sa kaulahian magproblema na nuon kay wa may natigom.

Kung gusto unta kita makabalay puhon ug dili na mag-abang og balay mas maayo nga sa sinugdanan pa man nagtigom na tang daan. Magkinabuhi kita ubos sa atong kinitaan. Pero daghan kanato nga nagkinabuhi labaw pa man sa kinitaan. Mosweldo og 500 mogasto og 600. Asa mang hustisya ana.