Nahinumdoman ang salidang Si Goot Da Wanderpol
Mobalik gyud sa akong panumdoman ang salida kaniadto nga Si Goat Da Wanderpol. Gibitoonan ning komedyang teleseryeha nilang Julian Daan nga nagdala sa role ni Teban ug si Allan Nacorda sa role ni Goliat. Pero niadto wa pa ko kaila sa ilang tinuod nga mga ngalan pero ilado na kaayo sila niadto sa ilang mga screen name nga Teban ug Goliat, kay mga artista man ni sila sa radyo. Wala gali ko masayod nga naa diay pelikula si Teban niadtong 1970s nga Manok ni San Pedro kay ang akong natan-awan sauna kay ang teleserye pod nilang duha nga sama pod og taytol sa pelikula ni Teban.
Basta mahinumdoman na gali nako ang salida nga Si Goat Da Wanderpol, mosantop dayon sa akong panumdoman ang parte sa salida nga kadlawon ug naay kanding mopakita. Mobalik pod sa akong panumdoman ang mga sinsiyo nga piso nga mangatagak kung palibangon na nila ang kanding. Mobalik pod sa akong hunahuna nga kong naay lain mopalibang sa kanding, dili mga kwartang sinsiyo ang mangatagak kundili ang hugaw sa kanding. Hasta ang babaye nga engkantada nga mopakita sa ibabaw sa bato mobalik pod sa akong hunahuna.
Ug naa poy mobalik sa akong pangisip nga naay parte sa salida nga magpakamatay si Teban ug kabuangan siya ni Timoy. Pero kaning parteha nga nagpakamatay si Teban, naglibog ko kung sa Si Goat Da Wanderpol ba o sa Manok ni San Pedro sa dihang wa pa nako makit-an og balik ang salidang Si Goat Da Wanderpol. Kay naa na man gud nag-upload sa Facebook ug sa Youtube. Dili man kompleto ang salida pero nagpamatuod ni sa akong mga panumdoman labi na ang akong gikalibgan. Pero kato noong sa akong panumdoman nga kadlawon nagpakita ang kanding, dili diay to kadlawon kundi gabii -- tungod tingale sa ilang camera effect nga pangitngiton bisag hayag sila nag shooting para morag gabii pero sa akong panan-aw kadlawon.
Tungod pod sa pagkakita nako sa salida og balik, sakto akong bana-bana nga tuig 1989 ang maong salida kay gipatik man sa video ang tuig. Maong nakaingon ko nga 1989, tungod kay ang parte sa salida nga nagpakita ang kanding nga ngitngit pa, nianang panahona nakabalo ko asa mi nagpuyo nga balay didto sa Cabantan sa dihang wa pa mi mobalhin og laing balay. Mao man gud na ang akong unang nahinumdoman ug ang TV pa namo niana black and white pa nga ang kaha kay kolor yellow.
Ang salida kung wa ko masayop, nilungtad ni hangtod 1994 pero magsige og balik balik. Kung magtan-aw ko sa salida mahibulong gud ko kung nganong lain sila magsultig bisaya. Wa pa ko masayod niadto kung ngano ing ato ang ilang sinultian -- tungod man gud kay mga artista sila sa radyo.
Mga buntag to magsugod ang ilang salida. Kung magsugod na gale, magtapok dayon ming mga bata niadto manan-aw sa TV sa among silingan. Malingaw gyud ming mga bata niadto tungod kay naay magic-magic ang ilang salida pero dili kaayo ko mokatawa sa mga komedya kay lagi di kaayo pa ko kasabot sa ilang pinaagi sa pagsulti sa bisaya. Hinuon pag 1994 makasabot na ko sa ilang sinultian og magkatawa na ko. Wala na nila gipadayon ang salida pero naa man say lain nga bag-ong salida niadtong 1994 nga komedya gihapon, ang Milyonaryong Mini. Naa pod toy drama nga Siya ug Ako sa Kangitngit, bahin sa magsuon nga ang lalake usa ka rebelde.
ANG PAGKAKITA OG BALIK SA SALIDA
| Imahe gikan sa post ni Andrew sa Memories of Old Cebu |
Ang 1989 ra nga episodes ang rekober pero ang sa 1990 ug 1991 wala pa.


Comments
Post a Comment